ఏబీ మెరుపులు...పంజాబ్ గెలుపు || Punjab second victory in the IPL 10 RCB vs Kings IX Punjab || ABD 8

ఐపీఎల్ పదో సీజన్‌లో కింగ్స్ ఎలెవన్ పంజాబ్ జట్టు వరుసగా రెండో విజయాన్ని ఖాతాలో వేసుకుంది. రాయల్ ఛాలెంజర్స్ బెంగళూరుతో సోమవారం రాత్రి జరిగిన మ్యాచ్‌లో 149 పరుగుల ఛేదనకు దిగిన పంజాబ్ జట్టు హసీమ్ ఆమ్లా (58 నాటౌట్: 38 బంతుల్లో 4x4, 3x6), మాక్స్‌వెల్ (43 నాటౌట్: 22 బంతుల్లో 3x4, 4x6) చెలరేగడంతో 14.3 ఓవర్లలోనే 150/2తో లక్ష్యాన్ని ఛేదించేసింది. అంతకముందు హిట్టర్ ఏబీ డివిలియర్స్ (89 నాటౌట్: 46 బంతుల్లో 3x4, 9x6) విధ్వంసక రీతిలో హిట్టింగ్ చేయడంతో తొలుత బ్యాటింగ్ చేసిన బెంగళూరు 20 ఓవర్లలో 4 వికెట్ల నష్టానికి 148 పరుగులు చేయగలిగింది. ఏబీ మినహా మిగత బ్యాట్స్‌మెన్ విఫలమవడంతో వాట్సన్ సేన తక్కువ స్కోరుతోనే సరిపెట్టుకోవాల్సి వచ్చింది. ఛేదనలో కూడా పంజాబ్ బ్యాట్స్‌మెన్‌ని బెంగళూరు బౌలర్లు ఏమాత్రం ఇబ్బంది పెట్టలేకపోయారు. ఓపెనర్ మనన్ వోహ్రా (34)ని జట్టు స్కోరు 62 వద్ద మిల్స్ పెవిలియన్‌కి పంపగా.. అక్షర్ పటేల్ (9)ని చాహల్ ఔట్ చేశాడు. అయితే ఒక ఎండ్‌లో క్రీజులో పాతుకుపోయిన ఆమ్లాతో కలిసి చివర్లో పంజాబ్ కెప్టెన్ మాక్స్‌వెల్స్ సిక్సర్లలో గెలుపు లాంఛనాన్ని పూర్తి చేశాడు. టోర్నీలో ఆడిన రెండు మ్యాచ్‌ల్లోనూ పంజాబ్ విజయం సాధించగా.. మూడో మ్యాచ్‌ ఆడిన బెంగళూరుకు ఇది రెండో ఓటమి

పదో సీజన్‌లో బెంగళూరు హిట్టర్ ఏబీ డివిలియర్స్ తన ఆగమనాన్ని ఘనంగా చాటాడు. ఓపెనర్లు షేన్ వాట్సన్ (1), విష్ణు వినోద్ (7)తో పాటు కేదార్ జాదవ్ (1) నిరాశపరచడంతో 5 ఓవర్లు ముగిసే సమయానికే బెంగళూరు 22/3తో పీకల్లోతు కష్టాల్లో పడింది. వెన్నునొప్పి కారణంగా గత రెండు మ్యాచ్‌లకు దూరమైన డివిలియర్స్.. తొలుత క్రీజులో కుదురుకునే వరకూ నెమ్మదిగా ఆడినా స్లాగ్ ఓవర్లలో గేర్ మార్చి వరుస సిక్స్‌లతో విరుచుకుపడ్డాడు. 16వ ఓవర్ వేసిన వరుణ్ అరోన్ బౌలింగ్‌లో ఓ సిక్స్ బాదిన ఏబీ.. స్టాయినిస్ వేసిన 17 ఓవర్‌లో రెండు సిక్సర్లు బాదేశాడు. 18 ఓవర్‌లో స్టువర్ట్ బిన్నీ (18 నాటౌట్ : 20 బంతుల్లో 1x4, 1x6) ఒక ఫోర్, సిక్స్ కొట్టగా.. ఏబీ కూడా ఓ బంతిని స్టాండ్స్‌లోకి తరలించేశాడు. డివిలియర్స్ దూకుడు పెంచడంతో 19వ ఓవర్‌ని సీనియర్ బౌలర్ సందీప్ శర్మ చేతికి పంజాబ్ కెప్టెన్ మాక్స్‌వెల్ బంతి ఇవ్వగా.. ఆ ఓవర్‌లోనూ ఈ హిట్టర్ ఒక ఫోర్, రెండు వరుస సిక్సర్లతో 19 పరుగులు రాబట్టేశాడు. చివరిగా 20వ ఓవర్‌ వేసిన మోహిత్ శర్మ బౌలింగ్‌లో చివరి రెండు బంతుల్ని డివిలియర్స్ సిక్స్‌లుగా మలచడంతో బెంగళూరు మెరుగైన స్కోరు చేయగలిగింది. ఇన్నింగ్స్ చివరి బంతిని ఏబీ భారీ షాట్ ఆడగా బంతి ఏకంగా స్టేడియం దాటి వెళ్లిపోవడం విశేషం. ఏబీ డివిలియర్స్, స్టువర్ట్ బిన్నీ జోడి ఐదో వికెట్‌కి 6.5 ఓవర్లలోనే అజేయంగా 80 పరుగుల భాగస్వామ్యం నెలకొల్పడం విశేషం. పంజాబ్ బౌలర్లలో వరుణ్ అరోన్ 2 వికెట్లు తీయగా.. సందీప్ శర్మ, అక్షర్ చెరో వికెట్ తీశారు.